PG&E Cog Lus Muab $50 Lab Duas Las los Nthuav Qhov Kev Pab Daws Tus Nqi rau Cov Neeg Siv Hluav Taws Xob uas Tshuav Tsis Tau Them Yav Dhau Los Kom Dav Dua Qub Cov Ntawv Sau Nqi Hluav Taws Xob

Nroog Oakland, Xeev Calif. — Pacific Gas and Electric Company (PG&E) cog lus muab nyiaj pab ntau txog $50 lab duas las rau cov kev pab cuam fab nyiaj txiag tshiab thiab ib txwm muaj lawm ntawd los pab rau cov neeg siv hluav taws xob uas muaj cai tsim nyog tau txais kev pab them rau lawv cov nqi uas tseem tshuav tsis tau them yav dhau los. Cov kev pab cuam no muaj xws li PG&E qhov kev pab cuam tshiab hu ua Match My Payment Program thiab qhov kev pab cuam twb muaj lawm hu ua kev pab cuam PG&E Relief for Energy Assistance through Community Help (REACH).

Qhov kev pab cuam tshiab PG&E Match My Payment Program muab ib qho kev sib dhos kom sib haum raws ib duas las-rau-ib duas las, ntau txog $1,000, pab rau cov neeg siv hluav taws xob uas muaj qhov nyiaj khwv tau los nyob rau theem qis txog rau theem nrab them lawv cov nqi uas tseem tsis tau them yav dhau los kom tsis txhob raug muab hluav taws xob kaw.  

Cov neeg siv hluav taws xob uas tsim nyog tau txais kev pab tej zaum yuav tau txais cov kev them nqi uas sib dhos sib haum ntawd los ntawm PG&E rau ntau cov kev them nqi raws li daim ntawv sau nqi hluav taws xob los ntawm lub xyoo, ntau txog rau qhov sib dhos sib haum siab kawg nkaus li ntawm $1,000. Piv txwv, ib tus neeg siv hluav taws xob uas tseem tshuav tsis tau them tus nqi yav dhau los muaj peev xwm ua ntawv thov kev pab rau Lub Rau Hlis Ntuj thiab ua qhov kev pab cuam ntawd txuas ntxiv mus rau Lub Kaum Hlis Ntuj yog hais tias lawv rov qab poob qab tsis tau them cov nqi ntawd ib zaug ntxiv. Qhov kev pab cuam no tas rau Lub Kaum Ob Hlis tim 31, 2025.  

Qhov muaj cai tsim nyog tau txais kev pab yog saib raws li cov lus qhia txog cov nyiaj khwv tau los ntawm tsoom fwv. Piv txwv, ib tsev neeg muaj plaub leeg uas tau nyiaj los tsawg dua $128,600 tauj xyoo yuav muaj cai tsim nyog tau txais kev pab. Qhov no yog siab dua tus ciaj ciam tsis pub tshaj $62,400 tam sim no rau ib tsev neeg uas muaj neeg coob ib yam nkaus raws li qhov kev pab cuam PG&E REACH. Cov ntaub ntawv qhia txog daim ntawv ua thov kev pab yuav nrhiav tau nyob rau ntawm no. 

Cov neeg ua ntawv thov kev pab yuav tsum them tsawg kawg $50 rau ntawm lawv qhov nyiaj tshuav tsis tau them txhua zaus kom thiaj tau txais cov nyiaj pab uas sib dhos sib haum no. Yuav tsum yog tshuav ib qho nqi tsis tau them tsawg kawg $100 mas thiaj li ua ntawv thov kev pab tau. 

PG&E kwv yees tias thaj tsam li 400,000 tus neeg siv hluav taws xob yuav muaj cai tsim nyog tau txais kev pab hauv qhov Match My Payment Program. Peev nyiaj yog muab faib raws li qhov leej twg xub thov ces xub tau txais kev pab, nyob ntawm qhov tseem muaj peev nyiaj pab. 

“Peb qhov kev pab cuam Match My Payment Program yog tsim los ua kom paub tseeb tias muaj cov tsev neeg coob dua qub tau txais qhov kev pab thaum lawv xav tau kev pab tshaj plaws, tshwj xeeb yog nyob rau cov hli caij ntuj sov thaum cov nqi hluav taws xob ntawd nce siab heev,” Vincent Davis, Tus Lwm Thawj Tswj Hwm Qib Siab Ntawm PG&E, Saib Xyuas Txog Kev Kawm Paub Ntawm Tus Neeg Siv Hluav Taws Xob tau hais li ntawd. “Peb nqua hu cov neeg siv hluav taws xob los mus kuaj xyuas lawv qhov kev muaj cai tsim nyog tau txais kev pab thiab ua ntawv thov rau qhov kev pab cuam uas muaj ntawd.” 

Tsis tas li ntawd kuj tseem muaj Kev Pab los ntawm PG&E REACH Program thiab  

Cov neeg siv hluav taws xob kuj tseem muaj cai tsim nyog tau txais kev pab them nqi los ntawm qhov kev pab cuam PG&E REACH thiab, uas muab kev pab cov neeg siv hluav taws xob uas muaj cai tsim nyog tau txais kev pab cuam raws qhov nyiaj khwv tau los uas muaj ib qho nyiaj khes div rau tus nqi siab txog li $300 nyob rau ntawm tus nqi hluav taws xob uas tseem tsis tau them yav dhau los.  Xyoo no muaj kev pab thaum muaj xwm txheej kub ntxhov ceev rau cov neeg siv hluav taws xob uas tau txais ib tsab ntawv ceeb toom txog kev txiav hluav taws xob. Cov theem ntawm qhov nyiaj khwv tau los nws qis dua qhov kev pab cuam PG&E Match My Payment Program.   

Cov neeg siv hluav taws xob uas tsim nyog tau txais kev pab uas twb tau txais ib qho nyiaj pab $300 los ntawm PG&E qhov kev pab cuam REACH nyob rau xyoo 2025 no lawm yuav muaj cai tsim nyog tau txais kev pab ua ntej tau txog $1,000 los ntawm PG&E qhov kev pab cuam Match My Payment Program, nrog rau ib qho nyiaj pab ntau kawg nkaus uas sib ntxiv ua ke txog li ntawm $1,300 rau ntawm qhov nyiaj uas tseem tshuav tsis tau them yav dhau los.  

Hauv xyoo 2024, ze li ntawm 58,000 cov neeg siv hluav taws xob ntawm PG&E tau txais ntau tshaj $50 lab duas las hauv qhov kev pab xam tag nrho los ntawm qhov kev pab cuam PG&E REACH. Qhov kev pab raws li hauv ntaub ntawv tau raug muab faib rau sawv daws tom qab PG&E tau nce cov nyiaj pab rau cov neeg siv hluav taws xob uas tsim nyog tau txais kev pab xyoo dhau los. 

PG&E cog lus nrog qhov Dollar Energy Fund (DEF) ntawm koom haum ua hauj lwm tsis vam nyiaj paj ntsig los mus lis cov ntaub ntawv thov kev pab ntawm cov neeg siv hluav taws xob rau qhov kev pab nyiaj ntawm qhov kev pab cuam. 

Kev pab nyiaj ntau ntxiv rau PG&E qhov Match My Payment, REACH, thiab lwm cov kev pab cuam daws cov nqi yuav muab tshuaj ntsuam tsis tu ncua thoob plaws lub xyoo los ua kom paub tseeb tias cov nyiaj pab muab faib tau zoo raws li cov neeg siv hluav taws xob cov kev xav tau. 

Kev Ua Kom Cov Neeg Siv Hluav Taws Xob Cov Nqi Nyob Tus

PG&E kwv yees tias yuav tsis muaj cov kev hloov pauv ntsig txog tus nqi hluav taws xob ntau ntxiv nyob rau ncua sij hawm uas tseem tshuav ntawm lub xyoo no lawm. Lub tuam txhab npaj siab tias cov nqi roj nkev (gas) thiab hluav taws xob uas muab sib ntxiv ua ke ntsig txog chaw nyob kom nyob tus txhob hloov mus los nyob rau ncua sij hawm uas tseem tshuav ntawm xyoo 2025 thiab kho kom nqis nyob rau xyoo 2026.

Tab txaws tias cov nqi yuav nyob tus los, cov neeg siv hluav taws xob tej zaum yuav pom cov nqi nce siab dua qub nyob rau cov hli caij ntuj sov thaum lawv siv hluav taws xob ntau dua qub los ua kom lawv cov vaj tsev thiab cov lag luam txias tuaj.

Lwm Cov Kev Pab Cuam Uas Muaj Cai Tsim Nyog Tau Txais Kev Pab Raws Li Qhov Nyiaj Khwv Tau Los 

PG&E muaj lwm cov txheej txheem muab kev pab cuam txhawm rau pab cov neeg siv hluav taws xob uas muaj cai tsim nyog tau txais kev pab cuam raws qhov nyiaj khwv tau los them lawv cov ntawv sau nqi hluav taws xob: 

• California Alternate Rates for Energy Program (CARE): muab ib qho kev txo nqi txhua hli li 20% los sis ntau dua ntawd rau ntawm cov nqi roj nkev (gas) thiab hluav taws xob.
• Family Electric Rate Assistance Program (FERA): cov lus qhia txog kev muaj cai tsim nyog tau txais kev pab tshiab muab ib qho kev txo nqi txhua hli li ntawm 18% rau ntawm hluav taws xob, tsis hais tsev neeg yuav coob los tsawg li cas. 
• Energy Savings Assistance Program (ESA): muab cov kev txhim kho ntsig txog kev txuag hluav taws xob yam tsis tau them nqi dab tsi li.  
• Low-Income Home Energy Assistance Program (LIHEAP): yog ib qho kev pab cuam uas tau txais kev pab nyiaj los ntawm tsoom fwv uas saib xyuas los ntawm lub xeev uas muab ib qho kev them nqi ib zaug txog li $1,500 rau cov ntawv sau nqi hluav taws xob uas tseem tsis tau them nyob rau yav dhau los pab cov tsev neeg uas muaj nyiaj khwv tau los nyob rau theem qis them rau cov nqi cua sov los sis cua txias nyob rau hauv lawv tej vaj tsev. Tej zaum cov kev them nyiaj kuj yuav sib txawv raws qhov chaw nyob thiab qhov muaj peev nyiaj pab.  
• Arrearage Management Plan (AMP): ib qho phiaj xwm kev npaj txog kev zam txim nuj nqi rau cov neeg siv hluav taws xob uas muaj chaw nyob uas muaj cai tsim nyog tau txais kev pab.  

Lwm cov kev pab cuam xws li qhov Medical Baseline, uas muab ib qho txo tus nqi rau cov neeg siv hluav taws xob uas yuav tsum tau siv fais fab rau qee qhov kev mob nkeeg. 

Txhawm rau kawm paub ntau ntxiv hais txog PG&E cov txheej txheem pab cuam muab kev pab, siv ib lub cuab yeej Savings Finder tshiab los sis mus saib tau rau ntawm pge.com/billhelp. 

Hais Txog PG&E 

Pacific Gas and Electric Company, ib lub tuam txhab me ncau los ntawm koom haum PG&E Corporation (NYSE:PCG), yog ib lub chaw tsim roj nkev (gas) tha mab xaj thiab hluav taws xob ob yam tib si uas xa mus rau ntau tshaj kaum rau sawm (million) leej neeg nyob thoob plaws 70,000 mais puag ncig nyob rau hauv Sab Qaum Teb thiab Sab Nruab Nrab Teb ntawm Xeev California. Rau lus qhia paub ntau ntxiv, mus saib tau rau ntawm pge.com thiab pge.com/news