Crossings TV Asian Television – Home to Asian Americans
Cov neeg uas raug dag ntxias tau poob nyiaj ntau txog $969 thaum muab los xam rau qhov nruab nrab nyob rau xyoo no los txog tam sim no
Nroog OAKLAND, Calif. — Nyob rau xyoo no los txog tam sim no, kev poob nyiaj los ntawm kev dag ntxias muaj kev cuam tshuam rau Pacific Gas and Electric Company (PG&E) cov neeg siv hluav taws xob ceev dua xyoo 2025, uas ua rau cov neeg siv hluav taws xob poob nyiaj ntau txog $211,000 los txog rau nrab xyoo. Txhawm rau kom pab tau cov neeg siv hluav taws xob paub txog cov yam ntxwv ntawm kev dag ntxias thiab zam kom txhob poob rau kev raug dag, PG&E yuav qhia ib cov tswv yim tseem ceeb thiab ceeb toom rau cov neeg siv hluav taws xob kom paub txog ib qho kev dag ntxias uas muaj tshwm sim tuaj uas yuav yog ib feem hauv qhov teeb meem no.
Qhov kev dag ntxias uas keev pom muaj ntau tshaj yog muaj cov neeg dag ntxias yuav hu xov tooj tuaj rau PG&E cov neeg siv hluav taws xob kom them nyiaj tam sid kom thiaj tsis raug muab hluav taws xob kaw. Ib qhov kev dag ntxias tshiab tau tshwm sim hauv xyoo 2026, uas cov neeg dag ntxias yuav hu xov tooj tuaj rau cov neeg siv hluav taws xob thiab tso hem thawj tias yuav muab hluav taws xob kaw, tom qab ntawd ces xa ib tus barcode los yog QR code hauv xov tooj los yog hauv tsev xa ntawv tuaj rau lawv. Ces muab lus qhia rau tus neeg siv hluav taws xob kom coj tus barcode los yog QR code mus rau tom ib lub khw muag khoom los yog chaw lag luam kom muab rau tus neeg ntaus them nyiaj ntawm rooj (cashier) los them nyiaj.
“Cov neeg dag ntxias yuav siv tswv yim los dag cov neeg siv hluav taws xob, ces qhov siv qhov kev ntxias ‘barcode scam’ sai dhau los no yog ib qho piv txwv ntawm qhov ntawd. Qhov tsis tau hloov hlo li yog qhov lawv tseem yuam kom them nyiaj tam sid kom zam qhov muab hluav taws xob tua. Yog koj tau txais ib tsab xov tooj li hom no, muab nws khwb kiag xwb. Yog muaj neeg tuaj rau ntawm koj lub qhov rooj es nug kom koj muab koj daim nqi fais fab rau nws saib, kaw kiag koj lub qhov rooj xwb. Ces tom qab ntawd, hu rau peb tus naj npawb 800 los yog nkag mus rau koj tus as-khauj nyob ntawm PGE.com los mus kuaj xyuas koj cov ntaub ntawv them nqi,” Matt Foley, tus coj tshawb nrhiav txog kev dag txhaum cai rau PG&E hais li.
“Nco ntsoov, PG&E ib txwm yeej tsis nug koj txog tej ntaub ntawv qhia paub txog fab nyiaj txiag thaum tham xov tooj hlo li los yog yeej tsis hais kom koj them nyiaj los ntawm kev siv tus bar code, QR code los yog cov npav debit them nyiaj ua ntej los sis siv cov kev pab xa nyiaj xws li Zelle, thiab peb yuav tsis thov saib koj daim nqi nyob ntawm koj lub qhov rooj,” nws hais li ntawd.
Los ntawm cov Naj Npawb
- Nyob rau xyoo 2025, PG&E tau txais ze li ntawm 24,000 tsab ntawv ceeb toom los ntawm cov neeg siv hluav taws xob uas tau raug cov neeg dag ntxias uas dag ntxias tias yog lub tuam txhab PG&E, thiab cov neeg siv hluav taws xob tau poob nyiaj thaj tsam li $301,000 hauv cov kev them nyiaj rau txoj kev raug dag ntawd, uas muaj tus neeg siv hluav taws xob poob nyiaj xam rau qhov nruab nrab ntau txog $590.
- Los txog rau nrab xyoos 2026, cov neeg siv hluav taws xob twb tau qhia paub muaj poob nyiaj ntau tshaj ntawm $211,000 rau cov neeg dag ntxias txog hluav taws xob, uas yog ze ntawm 30% nce siab tuaj hauv txoj kev poob nyiaj txog thaum lub xyoos los xaus, uas yog muab xam rau qhov nruab nrab ces yog poob txog $969.
Hmoov tsis zoo, tus lej ntawd tsuas yog ib qho me xwb yog muab piv rau ib thooj daus los sis dej nkoog ntab nyob saum nplaim dej lawm ntawm tag nrho kev dag ntxias, uas tseem tshuav ntau kis twb tsis tau muab coj los tshaj tawm.
Cov lag luam me thiab cov lag luam pes nrab kuj tseem yog ib daim phiaj rau lawv dag ntxias thiab, thiab cov neeg dag txhaum cai no yuav tsom ntsees rau lawv cov kev siv zog thaum lub sij hawm ua hauj lwm tsis khoom, dag kom cov tswv lag luam tias muaj xwm txheej kub ntxhov ceev es kom qhib cov qhov rooj thiab taws teeb cia. Hauv xyoo 2026, thaum tseem tsis tau txog nrab xyoos, PG&E twb tau txais ze ntawm 656 cov kev tshaj qhia paub tias muaj cov kev sim dag ntxias cov lag luam. Qhov ntawd yuav muaj tshwm sim ntau tshaj xyoo 2025, uas pom muaj 846 cov kev tshaj qhia paub txog cov neeg dag ntxias rau cov lag luam.
Cov yam ntxwv qhia tau txog kev dag txhaum cai
- Tso hem thawj tias yuav txiav hluav taws xob: Tej zaum mas cov neeg dag txhaum cai nod yuav siv lus khuj tseev kom cia li them nyiaj kiag tam sim ntawd uas yog lawv iab liam txog kev tsis tau them nqi hluav taws xob yav dhau los.
- Kev thov saib koj daim nqi: Yog muaj ib tus neeg tuaj rau ntawm koj tsev thiab thov saib koj daim nqi, tus no tsis yog neeg ua hauj lwm nrog PG&E.
- Hais kom them nyiaj tam sid siv daim npav debit los yog siv kev pab xa nyiaj (money transfer service): Cov neeg dag ntxias yuav qhia kom cov neeg siv hluav taws xob yuav ib daim npav debit them nyiaj ua ntej ces mam hu rov qab tuaj kom them nyiaj, los yog yuav hais kom them nyiaj siv qhov kev pab xa nyiaj xws li Zelle.
- Cov kev muab kev them nyiaj rov qab los sis nyiaj tau txais rov qab: Cov neeg dag ntxias yuav hais tias koj lub tuam txhab hluav taws xob tau tsub tus nqi tshaj hauv daim nqi hluav taws xob rau koj lawm thiab yuav tau them nyiaj rov qab rau koj, los sis koj muaj cai tsim nyog tau txais cov nyiaj rov qab, thiab hais kom koj qhia koj cov ntaub ntawv hauv tuam txhab cia nyiaj rau nws.
Cov neeg siv hluav taws xob yuav tuaj yeem pov thaiv lawv tus kheej tau li cas
Cov neeg siv hluav taws xob yuav tsum tsis txhob yuav daim npav them nyiaj ua ntej es thiaj zam tsis txiav hluav taws xob los sis tsis tua hluav taws xob. PG&E tsis sau qhia meej tias cov neeg siv hluav taws xob yuav tsum them nqi li cas thiab muab ntau txoj hauv kev los them nqi, suav nrog rau kev lees txais kev them nyiaj hauv oos lais, hauv xov tooj, daim ntawv ua qauv ntawm tuam txhab nyiaj yam av tas naus mav, raws kev xa ntawv los sis kiag ntawm tus kheej.
Yog tias tus neeg dag txhaum cai hem tias yuav txiav hluav taws xob los sis tua hluav taws xob kiag tam sid yam tsis muaj daim ntawv ceeb toom ua ntej, cov neeg siv hluav taws xob yuav tsum khwb xov tooj, tshwm tsab email tawm, los sis kaw qhov rooj. Cov neeg siv hluav taws xob uas muaj cov as khauj tsis them nuj nqis uas tau txais daim ntawv ceeb toom ua ntej, feem ntau yog xa raws kev xa ntawv tuaj thiab muaj lawv cov nqi them txhua hli nyob nrog.
Yog muaj neeg tuaj rau ntawm koj qhov rooj es hais tias yog ua hauj lwm nrog PG&E, cov neeg siv hluav taws xob yuav tsum paub tias PG&E cov neeg ua hauj lwm yeej muaj ib daim ntawv qhia txog nws thiab yeej npaj txhij muab rau koj saib thaum koj nug txog. Yog tias tus neeg siv hluav taws xob tseem muaj qhov xoom xaim, nws tuaj yeem hu tau rau 800-743-5000 kom paub meej seb tus neeg ntawd puas yog tuaj rau ntawd ua lub tuam txhab txoj hauj lwm. Thiab nco ntsoov tias, yog muaj ib tus neeg twg thov saib koj daim nqi, nws tsis yog ua hauj lwm nrog PG&E ces koj yuav tsum kaw qhov rooj.
Thov ceeb toom qhia rau koj paub hais tias, PG&E ib txwm yeej tsis tau ceeb toom rau ib tus neeg siv hluav taws xob yam faj seeb nyob rau hauv ib xuab moos ntawm kev muaj teeb meem khuam rau txoj kev pab cuam li, thiab peb ib txwm yeej tsis tau thov kom cov neeg siv hluav taws xob los them nyiaj yam siv daim npav txiav nyiaj tawm them nqi ua ntej, daim npav khoom plig, txhua hom nyiaj cryptocurrency los sis cov ev (aplication) hauv xov tooj uas them nyiaj hauv tshuab dis ntsis tauj (digital) los ntawm feem neeg thib peb hlo li xws li Zelle los sis Venmo.
Kev tso npe nkag siv ib tug as khauj hauv oos lais ntawm PGE.com yog lwm qhov kev tiv thaiv kom nyab xeeb. Tsis yog tias cov neeg siv hluav taws xob nkaus xwb thiaj tuaj yeem nkag mus saib lawv qhov nyiaj tshuav thiab keeb kwm kev them nyiaj tau, lawv tuaj yeem sau npe rau cov nyiaj them rov qab, tsis muaj ntawv sau nqi thiab cov kev ceeb toom uas muaj txiaj ntsig.
Cov Neeg Dag Ntxias Dag Tias Yog Tus Xov Tooj Uas Ntseeg Siab Tau: Tam sim no cov neeg dag txhaum cai nod muaj peev xwm los mus tsim cov naj npawb xov tooj 800 uas pom tshwm tseeb ntawm koj lub nab cos xov tooj tau. Cov naj npawb xov tooj nod yuav tsis txuas ncaj qha rov qab mus rau PG&E yog hais tias nej hu rov qab tuaj, txhawm li cas los xij, yog hais tias koj muaj kev poob siab, ntaus xov tooj thiab hu rau PG&E ntawm tus xov tooj 1-833-500-SCAM. Yog hais tias cov neeg siv hluav taws xob yeej ib txwm hnov tau hais tias muaj kev phom sij txog rau lawv lub cev, lawv yuav tsum hu rau 911.
Cov neeg siv hluav taws xob uas xav tias lawv tau raug tsim txom los ntawm kev dag ntxias, los sis xav tias raug hem thaum lub sij hawm
tiv tauj nrog ib tug ntawm cov neeg dag ntxias, yuav tsum tiv tauj rau tub ceev xwm hauv zos. Tsoom Fwv Pab Pawg Kws Saib Xyuas Kev Lag Luam (Federal Trade Commission) lub vev xaib kuj yog chaw muab hauv paus ntaub ntawv zoo hais txog kev tiv thaiv cov ntaub ntawv qhia paub txog tus kheej. Yog xav paub ntxiv hais txog cov kev dag ntxias, mus saib pge.com/scams los sis consumer.ftc.gov.