PG&E mus rau Cov Uas Kawm Tiav: Pov Cov Kaus Mom ya puag saum Huab Cua, Tsis Yog Cov Plab Yas Roj Hmab Hlau

Ua Kev Zoo Siab Kom Nyab Xeeb Lug Nyob Rau Lub Caij Nyoog Kev Kawm Tiav Nod, Tswj Cov Plab Yas Roj Hmab Hlau Kom Hnyav Poob Qis

OAKLAND, Calif.— Nrog rau lub caij nyoog kev kawm ntawv tiav hauv ib puag ncig txhua nrho, Pacific Gas and Electric Company (PG&E) tab tom ceeb toom rau cov neeg siv hluav taws xob paub txog cov kev pheej hmoo fab kev nyab xeeb ntawm zej tsoom sawv daws uas cuam tshuam txog cov plab yas roj hmab helium-uas muaj quav hlau: Yog hais tias koj qhov kev zoo siab rau kev kawm ntawv tiav cuam tshuam txog cov zais roj hmab, xyuas kom paub tseeb tias seb puas muaj kev ruaj ntseg nrog rau qhov hnyav. Tsis li ntawd, cov zais roj hmab yuav muaj peev xwm ya mus thiab mus chwv rau cov xaim hluav taws xob uas nyob siab tshaj taub hau rov saud, ua rau muaj kev phom sij rau fab kev nyab xeeb rau zej tsoom sawv daws.

Nyob rau hauv thawj tsib lub hlis ntawm xyoo 2025 nod, cov zais roj hmab ci uas tau mus chwv cov xaim hluav taws xob tau ua rau muaj cov kev hluav taws xob tuag tshwm sim ntau tshaj 130 zaus nyob rau hauv cheeb tsam uas muaj kev siv hluav taws xob ntawm PG&E nkaus xwb, uas cuam tshuam txog rau kev siv hluav taws xob rau cov neeg siv hluav taws xob coob tshaj 54,000 leej neeg. Cov kev hluav taws xob tuag no muaj peev xwm cuam tshuam kev pab cuam ntsig txog hluav taws xob mus rau ntawm cov chaw ua hauj lwm tseem ceeb xws li cov tsev kho mob, cov tsev kawm ntawv thiab cov teeb cheem tso cai khiav tsheb raws kev. PG&E feem ntau yeej keev pom ntau lawm nyob rau hauv ntau cov kev hluav taws xob tuag uas tshwm sim los ntawm cov plab yas roj hmab hlau nyob rau lub caij ua kev zoo siab rau kev kawm ntawv tiav nod.

“Tej zaum nws kuj yuav zoo li lom zem thiab zoo li ua koob tsheej txhawm rau tso cov plab yas roj hmab ya saum huab cua nyob rau cov koob tsheej ua kev zoo siab txog kev kawm tiav, tab sis mas thaum cov plab yas roj hmab helium-uas muaj hlau ya mus chwv cov xaim hluav taws xob nyob siab tshaj tob hau cov plab yas ntawd muaj peev xwm ua rau muaj kev hluav taws xob tuag mus rau txhia qhov chaw. PG&E txhawb siab xav kom cov tub ntxhais kawm ntawv tiav los mus ua kev zoo siab yam nyab xeeb lug los ntawm kev tswj xyuas cov plab yas roj hmab hlau kom muab zoj nrog tej yam uas hnyav cia,” Ron Richardson, PG&E Tus Lwm Thawj ntawm Feem Saib Xyuas Kev Xa Hluav Taws Xob tau hais li ntawd.

Cov zais roj hmab ci nod muaj plhaub nyiaj, uas yog ib hom hlau uas xa hluav taws xob tau. Yog hais tias cov zais roj hmab ntawd ya mus thiab mus chwv nrog cov xaim hluav taws xob, ces lawv muaj peev xwm txais tau hluav taws xob rau ncua sij hawm luv, ua rau muaj cov kev hluav taws xob tuag tshwm sim thiab ua rau cov xaim hluav taws xob kub hnyiab tau, uas ua rau muaj cov kev phom sij rau fab kev nyab xeeb rau zej tsoom sawv daws. Ob peb xyoos dhau los, muaj ib qho kev ua yeeb yam rov qab los tsev nyob rau hauv North Coast tau dhau mus ua tsaus ntais tom qab ib pab pawg plab yas roj hmab hlau ya tawm ntawm ib lub tog ntab thiab ya mus raug ib txoj xaim hluav taws xob, uas ua rau hluav taws xob poob. Ntau tshaj 2,700 cov neeg siv hluav taws xob tsis muaj hluav taws xob siv nyob rau yuav luag tag nrho ib hnub ntawd thiab lub koob tsheej seev cev rov qab los tsev kuj raug muab kheev xaum tseg lawm.

Ntawm no yog ib qho qauv piv txwv txog yam uas muaj peev xwm tshwm sim tau thaum cov zais roj hmab ci ntawd thiab mus chwv cov xaim hluav taws xob: https://www.youtube.com/watch?v=zqFm52C1n5Q

Txhawm rau xyuas kom paub tseeb tias cov kev ua kev zoo siab uas siv zais roj hmab rau kev kawm ntawv tiav kom muaj kev lom zem yam muaj kev xyuam xim, PG&E thiaj li ceeb toom rau cov neeg siv hluav taws xob paub txhawm rau ua raws li cov lus qhia txog kev nyab xeeb txog cov plab yas roj hmab uas tseem ceeb no:

“Ua Zoo Saib thiab Nyob Nyab Xeeb!” Siv yam ceev faj thiab tsis txhob ua kev zoo siab nrog cov zais roj hmab ci yam uas nyob ze rau ntawm cov hlua hluav taws xob.
Xyuas kom tseeb tias seb cov zais roj hmab ci uas ntim pa tshuaj puas muaj kev ruaj ntseg yam khi rau ib qhov khoom hnyav uas hnyav txaus los tiv thaiv cov zais ntawd kom txhob ntab ya mus. Tsis txhob tshem qhov hnyav tawm.
Tswj xyuas cov plab yas roj hmab hlau ntawd nyob rau sab hauv tsev, thaum tsim nyog ua tau. Rau kev nyab xeeb ntawm txhua tus, tsis txhob tso cov plab yas roj hmab hlau ya mus rau sab nraum zoov.
Tsis txhob muab cov zais roj hmab ci pav ua ke.
Tsis txhob sim rub ib hom twg ntawm zais roj hmab, tus vauj los sis khoom ua si uas khuam rau ntawm cov xaim hluav taws xob tawm. Cia nws nyob twj ywm li ntawd, thiab hu rau PG&E kiag tam sim ntawd ntawm 1-800-743-5000 txhawm rau qhia txog qhov teeb meem ntawd.
Tsis txhob mus ze ib txoj hlua hluav taws xob uas tau poob rau hauv av los sis dai rau saum huab cua. Yuav tsum xav tias cov hlua hluav taws xob muaj hluav taws xob tas li thiab nws txaus ntshai heev. Nyob deb, kom lwm tus nyob deb thiab hu kiag tam sim ntawd rau 911 txhawm rau ceeb toom rau cov thawj fab hauj lwm tub ceev xwm thiab tua hluav taws.

Hais Txog PG&E

Pacific Gas and Electric Company, ib lub tuam txhab me ncau los ntawm koom haum PG&E Corporation (NYSE: PCG), yog ib lub chaw tsim roj nkev (gas) tha mab xaj thiab hluav taws xob ob yam tib si uas xa mus rau ntau tshaj 16 sawm (million) leej neeg nyob thoob plaws 70,000 mais puag ncig nyob rau hauv Sab Qaum Teb thiab Sab Nruab Nrab Teb ntawm Xeev California. Rau lus qhia paub ntau ntxiv, mus saib tau rau ntawm pge.com thiab pge.com/news.