Lub Plaub Hlis Ntuj yog Lub Hli Uas Ua Kev Khawb Av Kom Muaj Kev Nyab Xeeb Thoob Teb Chaws, Ib qho Kev Ceeb Too

NROOG SAN FRANCISCO, Xeev Calif. — Txhua hnub nyob rau hauv Xeev California Nruab Nrab Teb thiab Sab Qaum Teb, cov xaim hluav taws xob nyob rau hauv qab av raug puas tsuaj vim los ntawm cov tswv tsev thiab cov neeg cog lus ua hauj lwm nrog lawv tsis hu xov tooj rau 811 ua ntej yuav pib ua cov khoos kas khawb av ntawd. Kev khawb av yam tsis tau paub txog tias qhov chaw ntawd muaj cov xaim hluav taws xob faus rau hauv av tsis yog tias nws tsuas phom sij nkaus xwb, nws kuj tseem ua rau yuav tau siv nyiaj ntau heev los mus kho thiab ua rau muaj cov kev tua hluav taws xob tsis yooj yim kiag li. Txhawm rau pab nthuav qhia kom muaj kev paub zoo txog qhov tseem ceeb ntawm kev hu xov tooj rau 811 ua ntej yuav ua ib qho khoos kas khawb av twg, Lub Plaub Hlis Ntuj thiaj li raug cim nco tseg tias yog Lub Hli Uas Ua Kev Khawb Av Kom Muaj Kev Nyab Xeeb Thoob Teb Chaws.

Cov xaim hluav taws xob nyob rau hauv qab av muaj cov nyob ntiav, qee zaum mas tsuas tob li ob peb nti (inches) hauv qab npoo av nkaus xwb, vim los ntawm kev av pob, cov khoos kas khawb av los sis kev tu tej toj roob hauv pes (chaw nuam yaj) dhau los, kev hloov pauv los sis kev teeb tsim ntawm qhov av ntawd thiab cov npoo av uas tsis tus. Cov neeg siv hluav taws xob yuav tsum tau hu xov tooj rau 811 yam tsawg kawg li ob hnub raws sij hawm ua hauj lwm ua ntej yuav pib ua ib qho khoos kas khawb av dab tsi, tsis hais loj los sis me, vim hais tias kev puas tsuaj txog rau txoj xaim hluav taws xob nyob rau hauv qab av thaum tab tom khawb av ntawd yog ib qho phom sij heev thiab ua rau cov neeg siv hluav taws xob ntawd yuav tau los mus lav them cov nqi kho kwv yees li $3,500.

“Kev hu rau 811 ua ntej yuav ua ib qhov khoos kas ua kev khawb av tsis hais loj los sis me ntawd yuav pab ua rau kom koj, koj tsev neeg thiab cov neeg nyob koom zej zos nyab xeeb thiab tsis tas li ntawd kuj tseem yuav pab koj zam kom dhau tej kev kho uas raug nqi kim thaj tsam li ntawm $3,500 yog hais tias koj ua rau ib txoj xaim hluav taws xob uas faus rau hauv av twg puas tsuaj thaum tab tom khawb av ntawd. Cov kws txhom nrhiav kev siv hluav taws xob uas txawj tshaj lij yuav tuaj rau ntawm koj tsev thiab yuav cim qhia qhov chaw uas nws tsis muaj xaim hluav taws xob faus rau hauv av es kom koj thiaj li muaj peev xwm khawb tau yam nyab xeeb thiab paub hais tias nws muaj dab tsi nyob rau sab hauv qab,” Joe Forline, PG&E tus lwm thawj tswj hwm txheej siab, feem saib xyuas chaw ua hauj lwm ntsig txog roj nkev (gas) hais li ntawd.

Nyob rau cov hli uas huab cua sov pom tau tias muaj cov khoos kas khawb av ntau dua qub tuaj, thiab hmoov tsis muaj kuj tseem pom muaj ntau cov khoos kas ntawd tab tom ua yam tsis muaj kev hu rau 811 txhawm rau ntaus cim rau cov chaw hluav taws xob uas faus rau hauv av rau cov chaw ua khoos kas ntawd. Qhov tseeb, raws li ib qho kev tshuaj ntsuam xyuas tsis ntev los no uas tau ua los ntawm Common Ground Alliance (CGA), 56% ntawm cov tswv tsev pheej nyiam npaj khawb av yam tsis tau hu xov tooj rau 811 ua ntej li. Tab sis, kev tsis hu xov tooj rau 811 ua ntej yuav ua kev khawv av ntawd tau ua rau muaj cov xwm txheej tshwm sim ntau tshaj 1,300 zaus nyob rau xyoo 2024 thaum cov xaim hluav taws xob nyob rau hauv qab av ntawd raug puas tsuaj vim los ntawm kev khawb av nyob rau hauv cheeb muab kev pab cuam ntawm PG&E ib leeg.

Xyoo 2024 los ntawm cov nab npawb:

• Muaj txog 1,302 cov xwm txheej tshwm sim nyob rau Sab Qaum Teb thiab Nruab Nrab Teb ntawm Xeev California uas cov tswv tsev los sis cov neeg cog lus ua hauj lwm nrog tau ua rau muaj kev puas tsuaj rau cov cua (gas) los sis cov xaim hluav taws xob faus rau hauv qab av thaum tab tom khawb av ntawd
• Hauv 60 feem pua ntawm cov xwm txheej thaum muaj ib txoj xaim hluav taws xob nyob rau hauv av tau raug puas tsuaj vim los ntawm kev khawb av, uas tsis tau hu rau 811.
• Rau cov tswv tsev tshwj xeeb mas, qhov feem pua ntawd nce siab mus txog 89 feem pua
• Qhov nqi feem nrab txhawm rau kho ib txoj xaim hluav taws xob uas puas tsuaj lawm ntawd yog $3,500
• Cov chiv keeb hauv paus teeb meem tseem ceeb uas ua rau muaj cov kev puas tsuaj txog rau cov xaim hluav taws xob nyob rau hauv qab av thaum tab tom khawb av ntawd muaj xam nrog rau: kev tsim ua los sis kev hloov pauv ib qho laj kab, kev ua los sis tu vaj zaub (vaj loog) thiab kev tu tej toj roob hauv pes (chaw nuam yaj), kev cog ib tsob ntoo los sis kev tshem ib tus ncej, thob dej ntws tawm thiab hauj lwm ntsig txog kev tauv pas dej rau liaj los sis ywg zaub thiab kev tsim ua ib lub lawj los sis vij xee

PG&E cov lus taw qhia txog kev khawb av uas nyab xeeb

• Ntaus cim rau cheeb tsam ua khoos kas ua tsos dawb: Txheeb xyuas qhov chaw khawb av los ntawm kev kos ib lub npov rau ib puag ncig ntawm cheeb tsam ntawd uas yog siv tus cuj mem tsos dawb, cov pas txhos tsos dawb, cov chij tsos dawb, cov xaum tsos dawb los sos cov hmoov cub tsos dawb.
• Hu rau 811 los sis xa ib tsab ntawv thov hauv oos lais (online) yam tsawg kawg li ob hnub raws sij hawm ua hauj lwm mus ua ntej ua kev khawb av: Npaj kom txhij txhawm rau muab qhov chaw thiab qhov chaw txhua yam (thuaj pais) ntawm qhov khoos kas ntawd, hnub tim uas pib ua qhov khoos kas thiab hom dej num (hauj lwm los sis kiv cab kas) ntsig txog kev khawb av. PG&E thiab lwm lub tuam txhab hluav taws xob yuav txheeb xyuas cov chaw hauv qab av nyob rau hauv cheeb tsam ntawd pub dawb xwb. Muaj peev xwm muab cov lus thov ntawd xa mus yam ntev kawg nkaus li ntawm 14 hnub ua ntej yuav txog hnub pib ua qhov khoos kas ntawd.
• Khawb av yam nyab xeeb lug: Siv cov cuab yeej siv tes thaum tab tom khawb av nyob rau hauv 24 nti (inches) ntawm qhov npoo sab nraud ntawm cov xaim hluav taws xob uas faus rau hauv qab av. Tseg cov chij cim qhia hluav taws xob, cov pas txhos los sis cov kob kos cim nyob twj ywm ntawd chaw mus kom rau thaum qhov khoos kas ntawd tiav lawm tso. Rov txhub thiab kho qhov av ntawd kom ceev rau.
• Ceev faj txog cov cim ntawm kev muaj cua (gas) xau raws tha mab xaj: Yuav tsum paub txog cov cim qhia ntawm cov pa roj a xau tawm uas tsw li tus ntxhiab “qe qauj”, mloog nws lub suab nrov zig zuag, nrov xuav los sis nrov tsuag thiab nrhiav seb puas pom muaj cov pas dej txuag mus rau cov huab cua, cov npuas tshwm hauv lub pas dej los sis kwj dej thiab muaj nroj tsuag tuag/qoob loo tuag nyob rau thaj chaw twg tshwj tsis yog hais tias nws noo lawm xwb.

Hais Txog CGA 

CGA yog ib lub koom haum uas tsav coj tus tswv cuab uas muaj cov kws txawj ua hauj lwm tiv thaiv kev puas tsuaj ze thaj tsam li 4,200 tus sib nrug ncua nyob rau txhua ntu ntawm lub lag luam tsim khoom uas muaj kev siv hluav taws xob nyob rau hauv qab av. Txij li tau tsim tsa nyob rau xyoo 2000, CGA tau muab siab rau txog kev cawm tib neeg lub neej txoj sia thiab kev tiv thaiv kev puas tsuaj txog rau hauv paus ntawm txoj kev txhim kho kev faus xaim hluav taws xob rau hauv av nyob rau Teb Chaws Mes Kas Sab Qaum Teb los ntawm kev txhawb siab txog cov kev xyaum ua kev tiv thaiv kev puas tsuaj kom tau zoo. CGA tau tsim nws ua ib lub hauv paus ntaub ntawv qhia txog kev tiv thaiv kev puas tsuaj zoo tshaj plaws raws li kev muab siab txhawm rau txo cov kev puas tsuaj uas tshwm sim rau cov chaw muaj kev faus xaim hluav taws xob rau hauv av nyob rau Teb Chaws Mes Kas Sab Qaum Teb kom muaj tsawg los ntawm tes hauj lwm uas sawv daws yuav tsum tau ua ntawm tag nrho cov neeg muaj feem xyuam. Rau lus qhia paub ntaub ntau ntxiv, mus saib tau rau ntawm CGA nyob rau hauv lub vas sab (web) ntawm http://www.commongroundalliance.com. 

Hais Txog PG&E

Pacific Gas and Electric Company, ib lub tuam txhab me ncau los ntawm koom haum PG&E Corporation (NYSE: PCG), yog ib lub chaw tsim cua (gas) xeeb txawm thiab hluav taws xob ob yam tib si uas xa mus rau ntau tshaj 16 sawm leej neeg nyob thoob plaws 70,000 mais puag ncig nyob rau hauv Sab Qaum Teb thiab Sab Nruab Nrab Teb ntawm Xeev California. Rau lus qhia paub ntau ntxiv, mus saib tau rau ntawm pge.com thiab pge.com/news.